Свята розуму, творчасці, таленту

“Зноў па нашым краі крочыць вясна, зноў вітаюць яе чароўныя салаўіныя песні, першыя навальніцы, зноў радуе нашы вочы  багатая палітра кветак і матылькоў. І зноў  сабралася разам  наша  вялікая сям’я,  каб падвесці вынікі навучальнага года і прывітаць тых, хто ўнёс у скарбонку гімназіі  свае дасягненні, перамогі, адкрыцці …”

Такімі лірычнымі  словамі пачалося 11 мая 2024 года ў Дзяржаўнай установе адукацыі “Гімназія № 6 горада Брэста імя Маршала Савецкага Саюза Жукава Г.К.” традыцыйнае свята “Алімпіёнік 2024”,  дзе адбылося падвядзенне вынікаў навучальнага года, віншаванне педагогаў, вучняў, якія сталі пераможцамі конкурсаў, навукова-практычных канферэнцый, алімпіяд па вучэбных прадметах.  

Асабліва хвалюючымі і доўгачаканымі, поўнымі сюрпрызаў сталі імгненні ўручэння дыпломаў у традыцыйных намінацыях: «Вучань  года», «Настаўнік года», «Сям’я года», «Жукавец года», «Клас года», «Гонар гімназіі» і многіх іншых.

У чарговы раз парадавалі ўдзельнікаў свята сваімі выступленнямі лаўрэаты абласных, рэспубліканскіх і міжнародных конкурсаў: Паліна Бантыш, Сафія Майсюк, Вікторыя Бандзюк, Дар’я Свібовіч, Маргарыта Філіпава, Мілана Панасюк,  Канстанцін Казанцаў. Па словах прысутных, мерапрыемства стала сапраўдным святам розуму, творчасці, таленту.